ИСТАНБУЛ (АА) - Палестинското движење на отпорот, Хамас, денес соопшти дека Катар е страната што ќе го објави очекуваниот договор за примирје со Израел, пренесува Анадолу.

„Сега прашањето е на браќата во Катар, тие ќе го објават договорот за примирје со Израел, вклучително и условите“, изјави Изат ал Ришек, член на политичкото биро на Хамас, за каналот Ал Џезира со седиште во Доха.

Тој додаде дека деталите за примирјето ќе бидат објавени во наредните часови.

„По објавувањето на договорот, тој ќе биде прифатлив за нас (Хамас) и ќе ги одрази заедничките барања на (палестинскиот) отпорот“, рече Ал Ришек.

Тој истакна дека пред да го даде одговорот на Хамас во врска со предлогот за примирје и неговите услови, шефот на Хамас, Исмаил Ханије, се сретнал со лидерот на Исламски џихад, Зијад ал-Нахала.

Доцна синоќа израелските државни медиуми објавија дека властите во Тел Авив дале зелено светло за докомплетирање на договорот за размена на заробеници, додавајќи дека чекаат одговор од Хамас.

Според израелските официјални процени, околу 240 лица се држат во заробеништво на Хамас во Газа од 7 октомври, кога Израел почна да ја бомбардира опколената енклава по ненадејниот напад на Хамас.

Вооруженото крило на Хамас, Бригадите Ал-Касам, од своја страна, претходно соопшти дека држи во заробеништво околу 200-250 лица, меѓу кои израелски војници и цивили, но потоа објави дека голем број од нив загинале за време на израелските воздушни напади низ Газа од 7 октомври.