ИСТАНБУЛ (АА) - Министерката за надворешни работи на Словенија, Тања Фајон, денес ги поздрави предложените мерки на Европската комисија против Израел, пренесува Анадолу.

„Словенија ги поздравува мерките на ЕУ против Израел“, напиша Фајон во објава на американската компанија за социјални медиуми X.

Таа истакна дека постапките на Словенија и другите земји истомисленички придонеле за одлуката.

„Израел врши геноцид врз Палестинците, што вчера го потврди независна истражна комисија на Обединетите нации (ОН). Европа мора да дејствува сега!“, додаде Фајон.

Нејзината објава дојде откако шефицата за надворешна политика на ЕУ, Каја Калас, денес ги откри плановите за редуцирање на трговските врски со Израел и санкционирање на високи функционери поради наодите за кршење на човековите права во Газа, што претставува голема промена во пристапот на блокот кон Тел Авив.

Марош Шефчовиќ, европскиот комесар за трговија и економска безбедност, рече дека предлогот ги цели клучните одредби од Евро-медитеранскиот договор, вклучувајќи го слободното движење на стоки, услуги, јавни набавки, конкуренција и интелектуална сопственост.

„Во практика, ова значи дека увозот од Израел во ЕУ ќе го изгуби преференцијалниот пристап до пазарот на ЕУ и дека на овие стоки ќе им се наплаќаат давачки на нивото што се применува за сите останати трети земји со кои ЕУ нема договор за слободна трговија“, изјави тој на прес-конференција во Брисел.

Комисијата, исто така, објави санкции за палестинската група на отпорот Хамас, екстремистичките министри во Кабинетот на израелската Влада и насилните доселеници. Европскиот совет сега треба едногласно да ја одобри одлуката.