свет

Во напад кај Триполи убиени 35 руски платеници

Руските платеници биле членови на Вагнер-групата основана од близок пријател на рускиот претседател, Владимир Путин

Ekipa   | 09.10.2019
Во напад кај Триполи убиени 35 руски платеници

ТРИПОЛИ (АА) - Во воздушен напад кај главниот град на Либија, Триполи, убиени се најмалку 35 руски платеници, пренесува Anadolu Agency (AA).

Францускиот весник „Ле Поинт“ (Le Point) јавува дека нападот бил изведен кон крајот на минатиот месец и дека станува збор за руски платеници кои се бореле на страната на источнолибиските сили лојални на командантот Халифа Хафтар.

Истиот извор јавува дека убиените биле членови на Вагнер-групата основана од близок пријател на рускиот претседател, Владимир Путин.

Силите на меѓународнопризнатата Влада на национално единство на Либија претходно соопштија дека во воздушен напад на 27 септември убиле најмалку 8 руски платеници.

Либискиот министер за внатрешни работи, Фатхи Бшага, минатиот месец рече дека Обединетите Арапски Емирати (ОАЕ) ги поддржуваат силите на Хафтар, користејќи руски и судански платеници.

Силите на Хафтар изведуваат напади на Триполи од април, а досега во судирите во главниот град на Либија загинале над илјада, а ранети се 5.500 луѓе.

Либија е средиште на длабока политичка и безбедносна криза уште од 2011 година, кога беше убиен Моамер Гадафи. Оттогаш, на власт се паралелни влади со седиште во Триполи и Тобрук, кои имаат посебни парламенти и вооружени сили.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.
Поврзани теми
Bu haberi paylaşın