سەرۆکی ھەرێمی کوردستان و باڵیۆزی بەریتانیا دۆخی ناوچەکە تاوتوێ دەکەن

ھەولێر ـ AA

بەگوێرەی ھەواڵێکی ماڵپەڕی سەرۆکایەتی ھەرێمی کوردستان ، لە کۆبوونەوەیەکدا سەرۆکی ھەرێمی کوردستان، نێچیرڤان بارزانی و باڵیۆزی بەریتانیا لە عێراق، جۆن وێلیکس باسیان لە بارودۆخی ئێستای عێراق، دوا پێشھات و بەرەوپێشچوونەکانی پەیوەندییەکانی ھەولێر ـ بەغدا و گفتوگۆی چارەسەرکردنی کێشە ھەڵپەسێردراوەکان کرد.

سەرۆکی ھەرێمی کوردستان، نێچیرڤان بارزانی ئاماژەی بە پشتگیریی سەرکردایەتیی سیاسیی ھەرێمی کوردستان و فراکسیۆنە کوردستانییەکان لە پەرلەمانی عێراق کرد بۆ پرۆگرامی حکوومەتی سەرۆکوەزیرانی عێراق،عادل عەبدولمەھدی بەمەبەستی گەیشتن بە چارەسەرێک بۆ کێشەکان.

لە کۆبوونەوەکەدا کە ئێوارەی ئەمڕۆ سێشەممە لە ھەولێر بەڕێوەچوو ، وێليکس کە بەمەبەستی ماڵئاوایی کردن و کۆتاییھاتنی ئەرکە فەرمییەکانی لە عێراق سەردانی نێچیرڤان بارزانی کردبوو، سەرۆکی ھەرێم کار و چالاکییەکانی لە ڕابردوودا بەرز نرخاند و ھیوای سەرکەوتنی بۆ خواست لە ئەرکی نوێیدا.

ھەر لە کۆبوونەوەکەدا تاوتوێکردنی ڕەوشی ئێستای ناوچەکە بەگشتی و دوا پێشھاتەکانی دۆخی سووریا بەتایبەتی، لایەنێکی دیکەی کۆبوونەوەکە بوو.