به‌شیر حه‌داد: "له‌ ئێستادا به‌دووری ده‌زانم هاوپه‌یمانیی فراكسیۆنه‌ كوردستانییه‌كان دابمه‌زرێت"

هه‌ولێر-AA

جێگری سه‌رۆكی ئه‌نجوومه‌نی نوێنه‌رانی عێراق رایده‌گه‌یه‌نێت پێویسته‌ حكوومه‌تی هه‌رێم و عێراقیش قه‌ره‌بووی دوكانداره‌كانی بازاڕی له‌نگه‌ی هه‌ولێر بكه‌نه‌وه‌.

ئه‌مڕۆ شه‌ممه‌ له‌ نووسینگه‌ی ئه‌نجوومه‌نی نوێنه‌رانی عێراق له‌ شاری هه‌ولێر ژماره‌یه‌ك له‌ په‌رله‌مانتارانی عێراق ئاماده‌ی كۆنگره‌یه‌كی رۆژنامه‌وانیی جێگری سه‌رۆكی ئه‌نجوومه‌نه‌كه‌ بوون كه‌ تێیدا یارمه‌تیی به‌سه‌ر چه‌ند خێزانێكی ئاواره‌ی كه‌ركووك و ناوچه‌كانی خورماتوو و داقوق دابه‌شكرد.

دواتر له‌ كۆنگره‌یه‌كی رۆژنامه‌وانیدا به‌شیر حه‌داد بۆ ده‌زگاكانی راگه‌یاندن روونی كرده‌وه‌ "ئێمه‌ پێشتر سه‌ردانی ژماره‌یه‌ك له‌ كه‌مپه‌كانی ئاواره‌كانی كه‌ركووك و خورماتوو و داقوقمان كرد و له‌نزیكه‌وه‌ گوێمان له‌ داواكارییه‌كانییان بوو و دواتر راپۆرتێكمان بۆ په‌رله‌مانی عێراق به‌رزكرده‌وه‌ له‌وباره‌یه‌وه‌ و داوای چاره‌سه‌ركردنی بارودۆخی ئه‌وان و ئاساییكردنه‌وه‌ی بارودۆخی ناوچه‌كانمان كردووه‌ بۆ كۆتایی هێنان به‌ دیارده‌ی چه‌كداریی و بۆ ئه‌وه‌ی به‌ ئاسانی ئه‌م ئاوارانه‌ بتوانن بگه‌ڕێنه‌وه‌ بۆ شوێنه‌كانی خۆیان و هاوكاریی ئه‌م خێزانانه‌ بكرێن و قه‌ره‌بووی زیانه‌كانییان بكرێته‌وه‌".

گوتیشی "كاری هه‌ره‌ له‌ پێشینه‌ی ئێمه‌ به‌نیسبه‌ت ئاواره‌كان پێش ئه‌وه‌ی یارمه‌تییان بده‌ین و چاره‌سه‌ری باردۆخی ئه‌وان بكه‌ین ئه‌وه‌یه‌ بگه‌ڕێنه‌وه‌ بۆ شوێنی خۆیان و ئه‌مه‌ش پێویستی به‌ ئاساییكردنه‌وه‌ی بارودۆخه‌كه‌ هه‌یه‌ و هه‌موو كارێكی یاسایی و سیاسی ده‌كه‌ین بۆ ئه‌وه‌ی بارودۆخه‌كه‌ ئاسایی بكرێته‌وه‌".

دواتر باسی له‌ لافاوه‌كه‌ی چه‌ند رۆژی رابردووی ده‌ڤه‌ری سۆران و باڵه‌كایه‌تیش كرد و گوتی "سه‌باره‌ت به‌ لافاوی چه‌ند رۆژی رابردوو كه‌ چه‌ندین خانوو و خێزان زه‌ره‌ریان پێگه‌یشتووه‌ و په‌یوه‌ندیی نێوان گونده‌كان بڕاوه‌ به‌هۆی رووخانی چه‌ند پردێك و هه‌وڵ ده‌ده‌ین ئه‌وانه‌ قه‌ره‌بوو بكرێنه‌وه‌ له‌لایه‌ن حكوومه‌تی هه‌رێمی كوردستان و وه‌زاره‌تی دارایی حكوومه‌تی عێراقیشه‌وه‌".

دواتر باسی له‌وه‌كرد كه‌ سه‌رۆكایه‌تیی لێژنه‌كانی په‌رله‌مانی عێراق هێشتا یه‌كلایی نه‌كراوه‌ته‌وه‌ به‌هۆی پێكنه‌هێنانی كابینه‌ی حكوومه‌ت و پاش ته‌واوبوونی كابینه‌كه‌ گفتوگۆ بۆ دابه‌شكردنی لێژنه‌كانیش ده‌كرێت.

هه‌رچی په‌یوه‌سته‌ به‌ بوودجه‌ی ساڵی 2019ی عێراقیش به‌شیر حه‌داد رایگه‌یاند "بوودجه‌ی ساڵی 2019 هێشتا نه‌گه‌یشتووه‌ته‌ په‌رله‌مان و له‌ ئه‌نجوومه‌نی وه‌زیرانی عێراقه‌، كه‌ی گه‌یشته‌ لای ئێمه‌ شی ده‌كه‌ینه‌وه‌ و گفتوگۆی له‌سه‌ر ده‌كه‌ین، به‌ڵام هێشتا ره‌شنووسه‌ و ئه‌گه‌ری گۆڕانكاریی كردن تێیدا هه‌یه‌".

له‌ وه‌ڵامی پرسیارێكی په‌یامنێری ئاژانسی ئانادۆڵو له‌مه‌ڕ ئه‌گه‌ری دروستكردنی هاوپه‌یمانێتییه‌ك له‌نێوان فراكسیۆنه‌ كوردستانییه‌كان، جێگری سه‌رۆكی ئه‌نجوومه‌نی نوێنه‌رانی عێراق به‌شیر حه‌داد رایگه‌یاند "پرسی له‌ ئێستادا فراكسیۆنه‌ كوردستانییه‌كان ببن به‌ یه‌ك هاوپه‌یمانی، جارێ به‌دووری ده‌زانم، به‌ڵام ئێمه‌ وه‌كو جێگری سه‌رۆك په‌رله‌مان هه‌وڵمان داوه‌ پێكه‌وه‌ دابنیشین و تا ئێستا سێ چوار جار كۆبووینه‌ته‌وه‌ و لێژنه‌یه‌كمان به‌ناوی لێژنه‌ی هه‌ماهه‌نگی فراكسیۆنه‌ كوردستانییه‌كان پێكهێنانه‌وه‌ كه‌ له‌سه‌رۆكی فراكسیۆنه‌كان پێكدێت و ئێمه‌ش سه‌رپه‌رشتیاری ئه‌و لێژنه‌یه‌ین وه‌كو جێگری سه‌رۆكی په‌رله‌مان بۆ ئه‌وه‌ی بیرورای فراكسیۆنه‌كان له‌سه‌ر پرسه‌كان بزانیین و گفتوگۆیان له‌سه‌ر بكه‌ین".

ده‌رباری ئاگرگه‌وتنه‌وه‌ له‌ بازاڕی له‌نگه‌ی هه‌ولێر كه‌ رۆژی پێنجشه‌ممه‌ "به‌هۆی شۆرتی كاره‌با" وه‌ وه‌كو لایه‌نه‌ فه‌رمییه‌كان باسی ده‌كه‌ن نزیك به‌ 2000 دوكانی تێدا سووتا و زیانه‌كان به‌ چه‌ندین ملیۆن دۆلار ده‌خه‌مڵێندرێت، جێگری سه‌رۆكی ئه‌نجوومه‌نی نوێنه‌رانی عێراق به‌شیر حه‌داد بۆ ده‌زگاكانی راگه‌یاندن گوتی "سووتانی بازاڕی له‌نگه‌ كێشه‌یه‌كی گه‌وره‌یه‌ و خه‌مباری كردین و سه‌ردانی له‌نگه‌ ده‌كه‌ین تا له‌نزیكه‌وه‌ ئاگاداری قه‌باره‌ی زیانه‌كان بین و بزانیین خه‌ڵك داواكاریی چییه‌ و حكوومه‌تی هه‌رێم هانبده‌ین چاره‌سه‌ری به‌ په‌له‌ بدۆزێته‌وه‌ و قه‌ره‌بووی ئه‌وان بكرێته‌وه‌ و له‌ به‌غداش داوای قه‌ره‌بوو ده‌كه‌ین و پێویسته‌ ئه‌مه‌ بكرێت".
هه‌روه‌ها گوتیشی "داوا له‌ حكوومه‌تی هه‌رێمی كوردستان ده‌كه‌ین په‌ڕاوێكی لێكۆڵینه‌وه‌ بكه‌نه‌وه‌ بۆ زانینی هۆكاری ئه‌و رووداوه‌ بۆ ئه‌وه‌ی دووباره‌ نه‌بنه‌وه‌، هه‌روه‌ها سیسته‌مێكی ئاگرگوژینه‌وه‌ی به‌هێز هه‌بێت له‌ بازاڕ و مۆڵه‌كان و شوێنه‌ گشتییه‌كان بۆ ئه‌و رووداوانه‌، هه‌روه‌ها كۆمپانیای دڵنیایی بگه‌ڕێته‌وه‌ و دڵنیایی زۆرملێ هه‌بێت بۆ ئه‌وه‌ی له‌كاتی رووداوه‌كاندا زیانه‌كان كه‌متر ببنه‌وه‌".