نەسروڵڵا: ''ئەمریکییەکان هەوڵیاندا کەناڵی پەیوەندی لەگەڵ حزبوڵڵا بکەنەوە''

بەیروت - AA

سکرتێری گشتیی حزبوڵڵای لوبنان، حەسەن نەسروڵڵا بانگەشەی ئەوەی کرد کە ئەمریکییەکان هەوڵیان داوە کەناڵی پەیوەندی لەگەڵ بکەنەوە.

لە چوارچێوەی چالاکییەکانی رۆژی عاشوورادا، نەسروڵڵا گوتارێکی بۆ پشتیوانانی دا و رایگەیاند ''ئەمریکییەکان هەوڵیاندا کەناڵی پەیوەندی لەگەڵ حزبوڵڵا بکەنەوە''.

حەسەن نەسروڵڵا لە گوتارەکەیدا گوتی: ''داواکاری پێشکەشکردنی ماڵ و پۆست و پێشخستنی بەرژەوەندیەکانمان درا لە سیستمی سیاسیی وڵاتدا. لە بەرامبەر ئەوەشدا داوا کرا واز لە دۆزەکەمان بهێنین، بەڵام ئێمە نەمان کرد و نایکەین''.

سکرتێری گشتیی حزبوڵڵای لوبنان باسی لەوە کرد کە رێکخراوەکەیان لە راگەیاندندا رووبەڕووی کەمپینێکی رەشکردنی بێ وێنە بووەتەوە و ئەوەیش بە شێوەیەکی چڕ بەردەوامە.

گوتیشی: ''هەندێک وڵات بۆ مەرامی خراپ سوپای ئەلیکترۆنیان پێکهێناوە و هەوڵی گۆڕینی رای گشتیی دەدەن دژبە وڵاتێک. باڵیۆزانی وڵاتانی بیانیی و کەنداو ملیۆنەها دۆلار دەدەن بە دەزگاکانی راگەیاندن بۆ بە ئامانجگرتنی حزبوڵڵا''.