ماکرۆن و ترەمپ لە بارەی "گەرمبوونی گەردوونەوە" تێڕوانینیان جیاوازە

پاریس – AA

سەرکۆماری فەڕەنسا ئێمانوێل ماکرۆن رایگەیاند لەگەڵ سەرۆکی ئەمریکا دۆناڵد ترەمپ هاوڕان لە بەرەنگاربوونەوەی تیرۆر، پێشهاتەکانی سووریا، لیبیا و ناوچەی بیابانی ئەفریقا بەڵام لە بارەی گەرمبوونی گەردوونییەوە بۆچونیان جیاوازە.

ماکرۆن لە کۆشکی ئەلیزێ لەگەڵ ترەمپ کۆبۆوە. دوای کۆبوونەوەی شاندی هەردوولا ماکرۆن و ترەمپ کۆنگرەیەکی رۆژنامەوانیان گرێدا.

لە کۆنگرە رۆژنامەوانییەکەدا ماکرۆن گوتی: "لە کۆبوونەوەکەی نێوانمان جەختمان لە هاوڕاییمان کردەوە لەبارەی پەیوەندییە بازرگانییەکان، بەرەنگاربوونەوەی تیرۆر و پێشهاتەکانی سووریا. لەبارەی لیبیا و ناوچەی بیابانی ئەفریقاش خاوەن دیدگایەکی هاوبەشین. لە زۆر بابەتدا هاوشێوەی یەکتر پێداگیرین. لە هەندێک بابەتیش وەک بابەتی گەرمبوونی گەردوون بۆچوونمان جیاوازە. من بەردەوام دەبم لە پابەندبوون بە رێککەوتننامەی کەشوهەوای پاریس".


ترەمپیش بە ستایشکردنی ماکرۆن دەستی کرد بە گوتەکانی و رایگەیاند: "بەڕێز ماکرۆن ئێوە سەرکۆمارێکی کارامە و سەرکردەیەکی مەزنن".

ترەمپ ستایشی تێڕوانینی ئابووری ئازادی ماکرۆنی کرد بە تایبەت دەستپێشخەرییەکانی بۆ لابردنی ئاستەنگەکانی بەردەم کەرتی گشتیی بۆ بەرەوپێشبردنی ئابووری و بازرگانی. ئاماژەی بەوەدا کە ئەوانیش هەوڵ دەدەن هەمان سیاسەت بگرنە بەر.