كۆمیسیۆنی هه‌ڵبژاردن: "نزیكه‌ی شه‌ش ملیۆن كه‌س مافی ده‌نگدانیان له‌ ریفراندۆمدا هه‌یه‌"

هه‌ولێر-AA
سیسته‌می هه‌ڵبژاردنه‌كانی په‌رله‌مانی كوردستان له‌سه‌ر سیسته‌می داخراو ده‌بێت وه‌كو هه‌ڵبژاردنه‌كانی پێشوو.

سه‌رۆكی كۆمیسیۆنی هه‌ڵبژاردن و راپرسی له‌ هه‌رێمی كوردستان هه‌ندرێن محه‌مه‌د له‌ هه‌ڤپه‌یڤینێكدا بۆ ئاژانسی ئانادۆڵو باس له‌ هه‌ڵبژاردنه‌كانی سه‌رۆكایه‌تی هه‌رێم و په‌رله‌مانی كوردستان و ریفراندۆم له‌سه‌ر چاره‌نووسی كوردستان ده‌خاته‌ روو، له‌وباره‌یه‌وه‌ ناوبراو رایده‌گه‌یه‌نێت "تایبه‌ت به‌هه‌ڵبژاردنی په‌رله‌مانی كوردستان و سه‌رۆكایه‌تی هه‌رێم فه‌رمانی سه‌رۆكایه‌تی هه‌رێممان پێگه‌یشتووه‌ بۆ ئه‌وه‌ی ئاماده‌كاری بكه‌ین بۆ دیاریكردنی رۆژێك بۆ ئه‌و مه‌به‌سته‌ و ئاماده‌كاری بۆ هه‌ڵبژاردن بكه‌ین، هه‌روه‌ها فه‌رمانێكی سه‌رۆكایه‌تیمان پێگه‌یشتووه‌ بۆ ئه‌وه‌ی ریفراندۆم ئه‌نجام بده‌ین له‌و رۆژه‌ی دیاریكراوه‌ كه‌ 25ی ئه‌یلوله‌، بۆیه‌ ئێمه‌ ئێستا له‌كۆمسیۆنی باڵای سه‌ربه‌خۆی هه‌ڵبژاردن و راپرسی هه‌رێمی كوردستان له‌ئاماده‌كارییداین له‌رووی هونه‌ری و كارگێری و داراییه‌وه‌ بۆ ئه‌وه‌ی خۆمان بۆ ئه‌و رووداوانه‌ ئاماده‌ بكه‌ین".

سه‌باره‌ت به‌ هه‌ماهه‌نگییان له‌گه‌ڵ حكوومه‌ت و سه‌رۆكایه‌تی هه‌رێم ناوبراو له‌وباره‌یه‌وه‌ ده‌ڵێت "ئێمه‌ كۆبوونه‌وه‌كانمان به‌رده‌وامه‌ له‌گه‌ڵ حكوومه‌تی هه‌رێم و دیوانی سه‌رۆكایه‌تی هه‌رێم له‌باره‌ی خۆ ئاماده‌كردن و هه‌ماهه‌نگی كردن له‌گه‌ڵیاندا له‌باره‌ی بوودجه‌ و مه‌سه‌له‌ی ئه‌منی و مه‌سه‌له‌ی كارگێڕی، چونكه‌ به‌شێكی زۆر له‌ وه‌زاره‌ت و له‌ دامه‌زراوه‌كانی حكوومه‌ت به‌شدارن له‌ پڕۆسه‌كانی هه‌ڵبژاردن و ریفراندۆم، بۆیه‌ ده‌مانه‌وێت ئه‌و هه‌ماهه‌نگییه‌ به‌رده‌وام بێت".

سه‌باره‌ت به‌دیاریكردنی رۆژێك بۆ ئه‌نجامدانی هه‌ڵبژاردنیش هه‌ندرێن محه‌مه‌د ده‌ڵێت هێشتا رۆژی ئه‌نجامدانی هه‌ڵبژاردنییان دیاری نه‌كردووه‌، له‌و باره‌یه‌وه‌ روونی ده‌كاته‌وه‌ "كۆمیسیۆنی هه‌ڵبژاردن و راپرسی له‌ هه‌رێمی كوردستان ده‌مێكه‌ گوتوومانه‌ به‌پێی یاسا ئێمه‌ ئاماده‌كارییه‌كان ده‌كه‌ین، فه‌رمانی سه‌رۆكایه‌تی هه‌رێم ئاراسته‌ی ئێمه‌كراوه‌ بۆ ئه‌وه‌ی رۆژی ئه‌نجامدانی هه‌ڵبژاردنی سه‌رۆكایه‌تی و په‌رله‌مانی كوردستان دیاری بكه‌ین، بۆیه‌ ئێمه‌ له‌م كۆبوونه‌وه‌ی ئه‌مڕۆماندا قسه‌ی له‌سه‌ر ده‌كه‌ین و تاوتوێی ئه‌و مه‌سه‌لانه‌ ده‌كه‌ین له‌نێویاندا مه‌سه‌له‌ی بوودجه‌ و كات و هه‌روه‌ها دیاریكردنی رۆژێك بۆ ئه‌نجامدانی هه‌ڵبژاردنی سه‌رۆكایه‌تی و په‌رله‌مانی كوردستان بزانین چی رۆژێك ده‌گونجێت بۆ ئه‌وه‌ی هه‌ڵبژاردنی تێدابكه‌ین، تا ئێستا یه‌كلایی نه‌بووه‌ته‌ به‌دیاریكراوی بزانین چی رۆژێك هه‌ڵبژاردن ده‌كرێت، بۆیه‌ ئێمه‌ قسه‌ له‌سه‌ر ئه‌م كاته‌ش ده‌كه‌ین و هه‌ركاتێك یه‌كلایی بوویه‌وه‌ ئه‌وا رایده‌گه‌یه‌نین".

سه‌باره‌ت به‌ ژماره‌ی ئه‌و كه‌سانه‌شی كه‌ بۆیان هه‌یه‌ ده‌نگ بده‌ن له‌ پڕۆسه‌ی ریفراندۆم و هه‌روه‌ها له‌ هه‌ڵبژاردنه‌كانی په‌رله‌مان و سه‌رۆكایه‌تی هه‌رێم سه‌رۆكی كۆمیسیۆنی باڵای سه‌ربه‌خۆی هه‌ڵبژاردن و راپرسی بۆ ئاژانسی ئانادۆڵو رایده‌گه‌یه‌نێت "به‌پێی ئه‌و لیستانه‌ی له‌لای ئێمه‌ له‌ هه‌رێمی كوردستان و له‌ناوچه‌ كوردستانییه‌كانی ده‌ره‌وه‌ی هه‌رێم ئه‌وانه‌ی ده‌توانن ده‌نگ بده‌ن له‌ پڕۆسه‌ی ریفراندۆم نزیكه‌ی شه‌ش ملیۆن ده‌نگده‌ر ده‌بێت، هه‌رچی بۆ هه‌ڵبژاردنه‌كانی هه‌رێمی كوردستانیش نزیكه‌ی سێ ملیۆن و 300 هه‌زار ده‌نگده‌رمان هه‌یه‌ له‌پارێزگاكانی هه‌ولێر، دهۆك، سلێمانی، هه‌ڵه‌بجه‌".

ده‌رباره‌ی شێوازی ئه‌نجامدانی هه‌ڵبژاردنیش روونی ده‌كاته‌وه‌ به‌پێی سیسته‌می لیستی داخراو ده‌بێت، له‌و رووه‌وه‌ رایده‌گه‌یه‌نێت "هه‌رچه‌نده‌ ویستێك هه‌بوو له‌لایه‌ن حزبه‌كان به‌تایبه‌ت و چه‌ند كۆبوونه‌وه‌یه‌كیش كرا بۆ ئه‌وه‌ی هه‌ڵبژاردنه‌كانی هه‌رێمی كوردستان به‌پێی سیسته‌می داخراو به‌ڕێوه‌بچێت، به‌ڵام تا ئێستا هیچ گۆڕانكارییه‌ك به‌سه‌ر ئه‌و سیسته‌مه‌دا نه‌هاتووه‌، بۆیه‌ هه‌ڵبژاردنه‌كانی داهاتووی هه‌رێمی كوردستان له‌سه‌ر ئه‌و سیسته‌مه‌ ده‌ڕوات كه‌ هه‌ڵبژاردنه‌كانی پێشووی له‌سه‌ر رۆیشتووه‌".

ده‌شڵێت "ئێمه‌ رۆژه‌كه‌مان دیاریكرد هه‌موو كاته‌ گرنگه‌كان بڵاوده‌كه‌ینه‌وه‌، ئێمه‌ رۆژه‌كانمان دیاریكردووه‌ بۆ ئه‌وه‌ی چه‌ند رۆژمان بۆ هه‌ر پڕۆسه‌یه‌ك ده‌وێت، به‌ڵام دیاریكردنی رۆژ و مانگی هه‌ڵبژاردن دواتر دیاری ده‌كرێت".

سه‌باره‌ت به‌وه‌ی له‌ ئه‌مساڵدا هه‌ڵبژاردن ئه‌نجامده‌درێت، هه‌ندرێت محه‌مه‌د جه‌ختی له‌سه‌ر ده‌كاته‌وه‌ و ده‌ڵێت "ئه‌و سێ مانگه‌ خه‌ریكی ریفراندۆم ده‌بین و دواتر بۆ ئه‌وه‌ كار ده‌كه‌ین هه‌ڵبژاردن بكه‌ین به‌شێوه‌یه‌كی جیددی".

ده‌شڵێت بۆ ئه‌و شوێنانه‌ی ناوچه‌ی ته‌ماسن له‌ ریفراندۆمدا هه‌وڵ ده‌ده‌ن كار بۆ دانانی میكانیزمی دیكه‌ی گونجاو بكه‌ن بۆ ئه‌وه‌ی ئه‌و خه‌ڵكانه‌ی ئه‌و ناوچانه‌ش ده‌نگیان نه‌فه‌وتێت، گوتیشی هه‌موو كار و ئاراسته‌یه‌كیان بۆ ئه‌وه‌یه‌ ریفراندۆم له‌كاتی خۆیدا ئه‌نجام بدرێت.