ئەمریكا: "هیچ بڕیارێكمان سەبارەت بە كشانەوەی هێزەكانمان لە عێراق نییە"
- وەزیری بەرگریی ئەمریكا، مارك ئێسپەر: "هیچ بڕیارێكمان سەبارەت بە كشانەوەی هێزەكانمان لە عێراق نەداوە".
Washington DC
ئەنقەرە ــ AA
وەزیری بەرگریی ئەمریكا، مارك ئێسپەر دەنگۆی كشانەوەی هێزەكانیان لە عێراق رەتكردەوە و رایگەیاند كە وڵاتەكەی هیچ بڕیارێكی لەوبارەوە نەداوە.
داوی بڵاوبوونەوەی نامەیەكی سوپای ئەمریكا كە تیایدا باس لەوە دەكات، عێراق بە فەرمی لەبارەی كشانەوەی هێزەكانی ئەمریكا لە عێراق ئاگاداركراوەتەوە، مارك ئێسپەر لەوبارەوە دوا و گوتی: "هیچ بڕیارێكمان سەبارەت بە كشانەوەی هێزەكانمان لە عێراق نەداوە".
ئەمەش لە كاتێكدایە رۆژی دووشەممەی رابردوو سەرۆكی ئەمریكا، دۆناڵد ترەمپ هەڕشەی كردبوو لەوەی ئەگەر بەغدا داوای كشانەوەی هێزەكانی ئەمریكا بكات ئەوا سزا بەسەر عێراقدا دەسەپێنێت.
هەڕەشەكەی دۆناڵد ترەمپ دوای ئەوە هات كە رۆژی یەكشەممەی رابردوو ئەنجوومەنی نوێنەرانی عێراق بە زۆرینەی دەنگی ئەندامانی دەنگی دا لەسەر بڕیارێك كە تیایدا داوا لە حكوومەتی عێراق دەكات كە كۆتایی بهێنێت بە بوونی سەربازی ئەمریكا لە وڵات.
لای خۆیەوە حكوومەتی عێراق رایگەیاند، رێكاری یاسایی دەگرێتەبەر بۆ ئەوەی بڕیارەكەی ئەنجوومەنی نوێنەران جێبەجێ بكات.
ئەم پێشهاتەش دوای ئەوە دێت کە رۆژی هەینی وه‌زاره‌تی به‌رگریی ئه‌مریكا (پنتاگۆن) رایگەیاندبوو کە فه‌رمانده‌ی فه‌یله‌قی قودس سه‌ربه سوپای پاسدارانی ئێران، قاسم سوله‌یمانی و جێگری سه‌رۆكی ده‌سته‌ی حه‌شدی شه‌عبی، ئه‌بو مه‌هدی موهه‌ندیس له هێرشێكی ئاسمانیی سوپای ئەمریکادا له‌سەر رێگای فڕۆكه‌خانه‌ی به‌غدا، كوژراون.
له هێرشه‌كه‌دا له‌پاڵ قاسم سوله‌یمانی و ئه‌بو مه‌هدی موهه‌ندیس، هەروەها ژماره‌یه‌ك ئه‌فسه‌ری ئێرانی سەربە سوپای پاسداران و پێنج كه‌سی عێراقی كه سه‌رجه‌میان ١٠ كه‌س بوون، كوژران.
دوای رووداوه‌كه رێبه‌ری باڵای شۆڕشی ئێران، ئایه‌توڵڵا عه‌لی خامنه‌یی رایگه‌یاندبوو "به رۆیشتنی ئه‌و (قاسم سولەیمانی)، ئه‌و كاره‌ی كه ئەنجامی دەدا ناوه‌ستێنرێت و رێبازه‌كه‌ی كۆتایی نایه‌ت. تۆڵه‌یه‌كی تاڵ چاوه‌ڕوانی تاوانبارانه".
ئایەتوڵڵا عه‌لی خامنه‌یی ماوه‌ی سێ رۆژ ماته‌می سه‌رانسه‌ری له ئێران راگه‌یاندبوو و له جێگه‌ی سوله‌یمانی-یش عه‌مید ئیسماعیل قائانی دانابوو.
هەر دوای هێرشه‌كه، ئه‌نجوومه‌نی باڵای ئاسایشی نیشتمانیی ئێران كۆبوونه‌وه‌یه‌كی نائاسایی ئه‌نجامدا و ئاشكرایكرد "تۆڵه‌یه‌كی توند" له ئه‌مریكا ده‌كرێته‌وه له كات و شوێنی گونجاودا.
![](http://www.facebook.com/sharer.php?u=https://www.aa.com.tr/ks/جيهان/ئەمریكا-هیچ-بڕیارێكمان-سەبارەت-بە-كشانەوەی-هێزەكانمان-لە-عێراق-نییە/1694534&p[images][0]=https://cdnuploads.aa.com.tr/uploads/Contents/2020/01/07/thumbs_b_c_10c38a44ce301596b0eb77a51792b583.jpg?v=085126&p[title]=ئەمریكا: "هیچ بڕیارێكمان سەبارەت بە كشانەوەی هێزەكانمان لە عێراق نییە"&p[summary]=- وەزیری بەرگریی ئەمریكا، مارك ئێسپەر: "هیچ بڕیارێكمان سەبارەت بە كشانەوەی هێزەكانمان لە عێراق نەداوە".
){kind=link}