هەرێمی کوردستان.. لە ئێستادا تەنها ١٥ تووشبووی کۆرۆنا لەژێر چاودێری پزیشکییدان

هەولێر - AA

وەزارەتی تەندروستیی هەرێمی کوردستان رایگەیاند، لەو پشکنینانەی لە ٢٤ کاتژمێری رابردوودا بۆ گومانلێکراوانی تووشبوو بە ڤایرۆسی کۆرۆنای نوێ (COVID-19) لە هەرێمی کوردستان ئەنجامیانداوە، سەرجەمیان نێگەتیڤ بوون و هیچ تووشبوویه‌کی نوێ تۆمارنەکراوە.

وەزارەتی تەندروستیی ھەرێمی کوردستان سەبارەت بە پەتای ڤایرۆسی کۆرۆنای نوێ (COVID-19) لە ھەرێمی کوردستان، راگەیەنراوێکی بڵاوکردەوە.

بەپێی راگەیەنراوەکە، لە میانی ٢٤ کاتژمێری رابردوودا، هەزار و ٢١٦ پشکنین لەسەر ئاستی هەرێمی کوردستان کە ٤٤٣ لە هەولێر، ٥٣٥ لە سلێمانی و ٢٣٨ لە پشکنین لە دهۆک لە ئەنجام دراوە.

وەک لە راگەیەنراوەکەدا کە کۆپییەکی گەیشتووەتە ئاژانسی ئانادۆڵو ئاماژەی پێدراوە، بەپێی دەرەنجامی پشکنینەکان، هیچ تووشبووێکی نوێ لە هەرێمی کوردستان تۆمارنەکراوە.

وەزارەتی تەندروستیی هەرێمی کوردستان ئاماژەی بەوەشکردووە کە لە سەرەتای سەرهەڵدانی ڤایرۆسی کۆرۆناوە تا ئێستا ٥٣ هەزار و ٤٨ پشکنین ئەنجامدراوە.

لە راگەیەنراوەکەی وەزارەتی تەندروستی ھەرێمی کوردستاندا ئاماژە بەوەشدراوە کە لە کۆی ١٠ هەزار و ٣٧٩ هاووڵاتیی کەرەنتین کراو، نۆ هەزار و ١٨٥ هاووڵاتیی لە کەرەنتین دەرچوون و دوای تەواو کردنی ماوەی ١٤ رۆژ و ئەنجامدانی پشکنینی تاقیگەیی بۆیان و پشتڕاستکردنەوەی ئەوەی کە هەڵگری ئەو نەخۆشییە نین، گەڕانەوەتە ناو خانەوادەکانیان و لەئێستادا تەنها هەزار و ٢٩٤ هاووڵاتیی لە ٣٢ شوێنی جیاوازی کەرەنتین ماونەتەوە کە ٤٣٥ لە هەولێر،١٦٠ لە سلێمانی، ٥٩٧ لە دهۆك و دوو هاووڵاتیی لە راپەرینن.

بەپێی داتاکانی وەزارەتی تەندروستی حکوومەتی ھەرێمی کوردستان، کۆی گشتی تووشبووان بە ڤایرۆسی کۆرۆنای نوێ COVID-19 لە هەرێمی کوردستان لە ئێستادا ٣٩١ تووشبوو، لەنێویاندا پێنج حاڵەتی گیانلەدەستدان هەیە و ٣٧١ نەخۆش چاکبووەتەوە، و لەئێستادا تەنها ١٥ نەخۆش لەژێر چاودێری پزیشکی دان.

حکوومەتی هەرێمی کوردستان بۆ رێگرییكردن لە بڵابوونەوەی زیاتری ڤایرۆسی کۆرۆنا، زنجیرەیەک رێکاری گرتووەتەبەر لەوانە قەدەغەکردنی هاتوچۆ، راگه‌یاندنی پشوو لە ناوەندەکانی خوێندن، داخستنی مزگەوت و شوێنە گشتییەکانی وەک پارک، مۆڵ، قاوەخانە، سینەماكان و چەند شوێنێکی دیکە، هەروەها وەستاندنی گەشتە ئاسمانییەکان و داخستنی دەروازە سنوورییەکان.