قەدەغەی ھاتوچۆ لە نێوان پارێزگاكانی هه‌رێم تا ١٨ی ئایار درێژكرایه‌وه‌

ھەولێر - AA

لە چوارچێوەی رێکارەکانی بەرەنگاربوونەوەی ڤایرۆسی کۆرۆنا لە ھەرێمی کوردستان، قەدەغەی ھاتوچۆ له‌ نێوان پارێزگاكانی هه‌رێمی كوردستان تا ١٨ی ئایار درێژ کرایەوە.

لە بەیاننامەیەکدا کە بە واژووی وەزیری ناوخۆی حکوومەتی ھەرێمی کوردستان، رێبەر ئەحمەد بڵاوکراوەتەوە، راگەیەندراوە کە قەدەغەی ھاتوچۆ له‌ نێوان پارێزگاكانی هه‌رێمی كوردستان تا ١٨ ئایار به‌رده‌وام ده‌بێت.

لە بەیاننامه‌کەی وەزیری ناوخۆی حکوومەتی ھەرێمی کوردستاندا ھاتووە کە قه‌ده‌غه‌ی هاتوچۆ له‌ نێوان پارێزگاكانی هه‌ولێر، سلێمانی، دهۆك و هه‌ڵه‌بجه‌، ئیداره‌ سه‌ربه‌خۆكانی راپه‌ڕین و گه‌رمیان به‌رده‌وام ده‌بێت له‌ ١١ی ئایاری ٢٠٢٠ تا ١٨ی ئایاری ٢٠٢٠ كاتژمێر ١٢ی شه‌و.

هه‌روه‌ها ئاماژه‌ به‌وه‌شكراوه‌ كه‌ قه‌ده‌غه‌ی هاتوچۆ له‌ نێوان هه‌رێم و پاره‌زگاكانی دیكه‌ی عێراق به‌رده‌وام ده‌بێت و ئه‌و هاووڵاتییانه‌ی دانیشتووی هه‌رێمی كوردستانن و له‌ پارێزگاكانی دیكه‌ی عێراق گیریان خواردووه‌ به‌هۆی قه‌ده‌غه‌ی هاتوچۆ، رێگایان پێده‌درێت بگه‌ڕێنه‌وه‌ هه‌رێمی كوردستان به‌ مه‌رجێك پشكینینی ڤایرۆسی كۆرۆنایان بۆ بكرێت و تا ده‌رچوونی ئه‌نجامی پشكنین كه‌ره‌نتین ده‌كرێن.

له‌ به‌شێكی دیكه‌ی به‌یاننامه‌كه‌دا ئه‌وه‌شخراوه‌ته‌ڕوو كه‌ ئاسانكاری ده‌كرێت بۆ ئه‌و هاووڵاتییانه‌ی كه‌ فه‌رمانبه‌ری حكوومین له‌ پاره‌زگاكانی مووسڵ، كه‌ركووك، دیاله‌ كه‌ هاووسنوورن له‌گه‌ڵ هه‌رێمی كوردستان و نیشته‌جێی هه‌رێمی كوردستانن و به‌ پێچه‌وانه‌ به‌ مه‌به‌ستی هاتوچۆكردنی رۆژانه‌یان له‌ نێوان شوێنی كاركردن و شوێنی نیشته‌جێبوونییان به‌ ره‌چاوكردنی رێنماییه‌ ته‌ندروستییه‌كان به‌ مه‌رجێك هه‌فتانه‌ پشكنینی كۆرۆنا له‌و پارێزگایه‌ی كه‌ لێی فه‌رمانبه‌رن، ئه‌نجام بده‌ن.

ھەروەھا دەسەڵات دراوە بە پارێزگا و ئیدارە سەربەخۆکان به‌ مه‌به‌ستی رێگاپێدان به‌ كردنه‌وه‌ی شوێنی خزمه‌تگوزاری به‌پێی مه‌رج و رێنماییه‌ ته‌ندروستییه‌كان.

هه‌موو ئه‌و شوێنانه‌ كه‌ ره‌زامه‌ندی كاركردنییان پێدراوه‌ و كراو ده‌بن، پێویسته‌ ته‌واوی مه‌رجه‌ ته‌ندروستییه‌كان جێبه‌جێ بكه‌ن له‌ به‌ستنی ده‌مامك و ده‌ستكێش و دروستنه‌كردنی قه‌ره‌باڵغی، پێویسته‌ له‌ هه‌ر شوێنێك مه‌ودای نێوان دوو كه‌س له‌ یه‌ك مه‌تر و نیو كه‌متر نه‌بێت.

ئاماژه‌ به‌وه‌شكراوه‌ كه‌ ئاڵوگۆڕی بازرگانی بە پێیی رێنماییەکانی پێشووتر بڕیاریان لەسەردراو بەردەوام دەبێت و رێگاپێدان لە نێوان پارێزگا و ئیدارە سەربەخۆکان، و لەناو پارێزگا و ئیدارە سەربەخۆکان بەپێی سیستەمی رێگاپێدانی ئەلیکترۆنی دەبێت لە وێبسایتی وەزارەتی ناوخۆ دانراوە و، ھاووڵاتیی دەتوانێت لە حاڵەتی زۆر پێویستدا داوای رێگاپێدان بکات و بەپێی ئەو رێنماییانەی کە لەو سیستەمە دیاریکراوە.

وەزارەتی ناوخۆی ھەرێمی کوردستان راشدەگەیەنێت کە ھەر کەسێک سەر بە ھێزە ئەمنییەکانی راسپێردراو بە جێبەجێکردنی کارەکانی سەرەوە کەمتەرخەمی بنوێنێت لە جێبەجێکردنی بڕگەکانی ئەم بەیانە لەکاتی ئەرکدا، بەپێی یاسا سزا دەدرێت و ھاتوچۆکردنی ئاژانس و رێکخراوەکانی یوئێن و رێکخراوە نێودەوڵەتییەکان و ھاوپەیمانان و دیپلۆماتکاران رێگەیان پێدراوە لەسەرتاسەری ھەرێمی کوردستان.

ھاوکات دەروازە سنوورییەکانی، پەروێزخان، باشماخ، حاجی ئۆمەران، ئیبراھیم خەلیل و سەرزێرێ، سه‌یرانبه‌ند، كێڵێ، ته‌وێڵه‌، پشته‌ و شوشمێ و، ھەردوو فڕۆکەخانەی نێودەوڵەتی ھەولێر و سلێمانی بەڕووی گەشتیاراندا بە داخراوی دەمێنێتەوە و ھیچ کەسێک بەبێ رەزامەندی وەزیری ناوخۆ رێگای پێ نادرێت بگەڕێتەوە ھەرێمی کوردستان ئەگەر لە دەرەوە وڵات بێت، لە کاتی گەڕانەوەیان لەو پارێزگایە یان ئەو ئیدارە سەربەخۆیەی کە لێی نیشتەجێیە کەرەنتین دەکرێن و پێویستە لەسەر ژووری ئۆپەراسیۆنەکان، گشت رێکارە تەندروستی و ئەمنییەکانی بگرێتەبەر.

له‌ به‌شێكی دیكه‌ی به‌یاننامه‌كه‌دا هاتووه‌ كه‌، ده‌روازه‌ی سنووریی ئیبراهیم خه‌لیل، حاجی ئۆمه‌ران و باشماخ، به‌رووی هاووڵاتییانی هه‌رێمی كوردستان و عێراق ده‌كرێته‌وه‌ له‌ كاتژمێر هه‌شتی به‌یانی تا ١٢ی شه‌و به‌ مه‌به‌ستی گه‌ڕانه‌وه‌ی ئه‌و هاووڵاتییانه‌ی كه‌ له‌ وڵاتی توركیا و ئێران گیران خواردووه‌ و، هاووڵاتییانی پارێزگاكانی دیكه‌ی عێراق راسته‌وخۆ ره‌وانه‌ی سنووریی پارێزگای مووسڵ ده‌كرێنه‌وه‌.

ئه‌وه‌شخراوه‌ته‌ڕوو كه‌ ئه‌و بیانیانه‌ی كه‌ وه‌كو مامۆستا له‌ قوتابخانه‌ و په‌یمانگا و زانكۆكانی هه‌رێمی كوردستان كار ده‌كه‌ن، رێگایان پێ ده‌درێت بگه‌ڕێنه‌وه‌ هه‌رێمی كوردستان به‌ مه‌رجی نشینگه‌ی هه‌رێمی كوردستانییان هه‌بێت و وه‌زاره‌تی په‌یوه‌نددار پشتگیرییان بكات.

وه‌به‌رهێنه‌رانی بیانی و بازرگاكان و فه‌رمانبه‌رانی بیانی بانكه‌كان رێگایان پێ ده‌درێت بگه‌ڕێنه‌وه‌ هه‌رێمی كوردستان به‌ هه‌مان مه‌رجه‌كانی بڕگه‌ی یه‌كی سه‌ره‌وه‌.

لەبارەی ئەو ھاووڵاتییانەی ھەڵگری پاسپۆڕتی عێراقین و لە دەرەوەی ھەرێمی کوردستانن وەزارەتی ناوخۆی ھەرێمی کوردستان رێنمایی داوە کە ئەو کەسانە بە رێگەی ئەو گەشتانە دەگەڕێنەوە کە لەلایەن فەرمانگەی پەیوەندییەکانی دەرەوە رێکدەخرێن، لەسەر ئەرکی خۆیان کەرەنتین دەکرێن. جگه‌ له‌ قوتابییان كه‌ بۆ مه‌به‌ستی خوێندن له‌ ده‌ره‌وه‌ بوون، نه‌خۆشه‌كان كه‌ پاڵپشتی نه‌خۆشخانه‌كانییان هه‌یه‌ و بۆ مه‌به‌ستی وه‌رگرتنی چاره‌سه‌ری گه‌شتییان له‌ماوه‌ی دوو مانگی رابردوودا كردبێت.