"ژماره‌ی ئه‌و هاووڵاتییانه‌ی له‌ بوومه‌له‌رزه‌كه‌ی ئه‌لعه‌زیزدا گیانیان له‌ده‌ستداوه‌ گه‌یشتووەته‌ 31 كه‌س"

ئه‌نقه‌ره‌- AA

سه‌رۆكایه‌تی ئیداره‌ی كاره‌سات و باری له‌ناكاوی توركیا (AFAD) رایگەیاند کە ژماره‌ی ئه‌و هاووڵاتییانه‌ی له‌ بوومه‌له‌رزه‌كه‌ی ئه‌لعه‌زیزدا گیانیان له‌ده‌ستداوه‌ گه‌یشتوه‌ته‌ 31 كه‌س.

له‌ راگەیەنراوێكی سه‌رۆكایه‌تی ئیداره‌ی كاره‌سات و باری له‌ناكاوی توركیا (AFAD)هاتووه‌ "نۆ هه‌زار و 233 خیوەت گه‌یه‌ندراوه‌ته‌ ئەو ناوچه‌یەی کە بوومه‌له‌رزه‌كه‌ی تیایدا روویداوە و له‌ ئه‌نجامی سه‌رژمێری و پشكنینی بیناكانیشدا ده‌ركه‌وتووه‌ کە 76 بینا به‌ته‌واوی داڕووخاون و 642 بینا زیانی زۆریان به‌ركه‌وتووه‌ و 425 بیناش به‌ڕێژه‌ی كه‌م و مامناوه‌ند زیانیان به‌ركه‌وتووه‌".

هەروەها هاتووە "تا ئێستاش تیمه‌ فریاگوزارییه‌كان توانیویانه‌ 45 كه‌س به‌زیندووی له‌ژێر داروپه‌ردووی بینا داڕووخاوه‌كان بهێننه‌ ده‌ره‌وه‌ و ژماره‌ی ئه‌و كه‌سانه‌یشی گیانیان له‌ده‌ستداوه‌ گه‌یشتوه‌ته‌ 31 كه‌س و هه‌زار و 607ی دیکەیش برینداربوون".