وان.. لەو ناوچەیەی دوێنێ شەش خانوو بەهۆی لافاو رووخان ئەمڕۆش لافاو دروست بووەوە

وان - AA

دوای ئەو بارانە بەلێزمەیەی کە دوێنێ قەزای باشکالە سەربە پارێزگای وان-ی گرتەوە و لافاو دروست بوو و بەهۆیەوە شەش خانوو رووخان، ئەمڕۆش لە ناوچەی ئەسەنیاماچ بەهۆی بەردەوامی باران بارینەوە لافارو دروست بووەوە.

ئەمڕۆ لە کاتی کارەکانی پاککردنەوەی ئەو خۆڵ و خاشاکەی لافاوەکەی کۆیکردبووەوە، سەرلەنوێ باران بارییەوە و تیمەکان کارەکەیان راگرت، تیمەکانی جەندرمەش هاووڵاتییانیان ئاگادارکردووە لە گرتنەبەری رێوشوێنی پێویست.

بەهۆی ئەو بارانە بەلێزمەیەی دوای نیوەڕۆ ناوچەکەی گرتەوە، ژمارەیەکی زۆر لە خانوو و ئۆتۆمبێل ژێرئاو کەوتن.

پێش دروستبوونی لافاوەکەی ئەمڕۆ، قایمقامی قەزاکە کە لەگەڵ لێژنەکان سەرقاڵی دیاریکردنی زیانەکان بوو، بە رۆژنامەنووسانی راگەیاند کە دوێنێ بەهۆی لافاوەکەوە شەش خانوو رووخاون و ٣٠ خانووش زیانی زۆریان بەرکەوتووە.