ئەدەنە - AA

سەرۆکی پەرلەمانی تورکیا کورتوڵموش، لە گوتارێکدا کە لە ڕێوڕەسمی کردنەوەی ساڵی خوێندنی ٢٠٢٥-٢٠٢٦ی زانکۆی چوکورئۆڤا (ÇÜ)دا پێشکەشی کرد، ئاماژەی بەوە کرد کە لە قۆناغێکی مێژووییدان.

کورتوڵموش باسی لەوە کرد خاوەنی هێز، زانیاری و توانان بۆ بەرهەمهێنانی ئەو شتانەی کە ڕاست و باش و بەسوودن بۆ هەموو مرۆڤایەتی و، ڕایگەیاند: "تەنیا با یەکگرتوو بین، با پێکەوە بین، و با بە باشترین شێوە ئەو دەرفەتانەی لە پارێزگاکەماندا هەن بەکاربهێنین بۆ ئەوەی سوودی بۆ وڵاتەکەمان و هەموو مرۆڤایەتی هەبێت".

کورتوڵموش جەختی لەسەر ئەوە کردەوە کە تورکیا لەم قۆناغە هەستیارەدا پێویستە پێش هەموو شتێک یەکێتیی و یەکبوونی ناوخۆی خۆی بەهێز بکات و، گوتی: "لەسەر ئەو بنەمایە ئیدی کێشەی تیرۆر ناهێڵین، کە نزیکەی ٥٠ ساڵە وەک کۆت و بەندێک بە قاچمانەوە بوو و ڕێگریی لە پێشکەوتنی کۆمارەکەمان دەکرد. وەک تورکیا کێشەی تیرۆر کە وەک داردەستی پرۆژە ئیمپریالییەکان و بەشێک لە سیاسەتی دابەشکارییەکانیان بەکاردەهێنرا، بۆ هەمیشە چارەسەر دەکەین. بۆ ئەم مەبەستە برایەتی هەتاهەتایی نێوان ٨٦ ملیۆن هاووڵاتیمان، کە لە تورک و کورد و عەرەب و گشت پێکهاتە نەتەوەیی و مەزهەبییەکان پێکدێن و سەدان ساڵە بە یەکەوە دەژین، بەهێزتر دەکەین".

سەرۆکی پەرلەمانی تورکیا کورتوڵموش، جەختی لەسەر ئەوە کردەوە کە تورک و کورد لە ساڵی ١٠٧١ـەوە پێکەوە ئانادۆڵویان کردووەتە لانکەی ئیسلام و لە جەنگەکانی چاناککالە و جەنگی جیهانی یەکەم پێکەوە لە یەک سەنگەردا شەهید بوون و، گوتی: "ئەم خاکەی ئانادۆڵو، نیشتمانی هاوبەشی شارستانییەتی هەموومانە. لە چوارچێوەی ئامانجی تورکیای بێ تیرۆردا زۆر نزیک بووینەتەوە لە کۆتاییهێنان بەو کێشەیە. لەمەودا ڕێگە نادەین تەنانەت یەک کەسیش لەم وڵاتەدا بکەوێتە دەست ڕێکخراوە تیرۆریستییەکان، هەرگیزا و هەرگیز ڕێگە نادەین تیرۆر لەم وڵاتەدا وەک داردەست لەلایەن هێزە بیانییەکانەوە بەکاربهێنرێت''.