سەرۆکوەزیران بارزانی و سەرۆکی دەستەی دەستپاکی هەرێم باس لە بەرەنگاربوونەوەی گەندەڵی دەکەن

سەرۆکوەزیرانی ھەرێمی کوردستان-عێراق مەسرور بارزانی، پێشوازی لە سەرۆکی دەستەی دەستپاکیی ھەرێمی کوردستان ئەحمەد ئەنوەر کرد و باسیان لە ھەوڵەکانی بەرەنگاربوونەوەی گەندەڵی و بەھێزکردنی ھەماھەنگی نێوان دەزگا پەیوەندیدارەکان کرد.

ماڵپەڕی حکوومەتی ھەرێمی کوردستان بڵاویکردووەتەوە کە لە دیدارەکەدا، سەرۆکی دەستەی دەستپاکی، کورتەیەکی دەربارەی کار و چالاکییەکانی دەستەکەیان لە ماوەی ڕابردوودا خستەڕوو، ھاوکات لە کۆبوونەوەکەدا جەخت لە گرنگیی بەھێزترکردنی ھەماھەنگی و ھاریکاریی نێوان دەزگا پەیوەندیدارەکانی ھەرێمی کوردستان بۆ ڕووبەڕووبوونەوەی گەندەڵی و نەھێشتنی بەھەدەردانی سامانی گشتی کرا.

ئەوەشخراوەتەڕوو کە سەرۆکوەزیران مەسرور بارزانی وێڕای دووپاتکردنەوە لە پابەندبوونی حکوومەتی ھەرێمی کوردستان بە ڕووبەڕووبوونەوەی گەندەڵی بە ھەموو جۆرەکانییەوە، ئامادەیی حکوومەتیشی بۆ پێشکەشکردنی ھەموو ئاسانکاریی و ھەماھەنگییەک لەگەڵ دەستەی دەستپاکی لەپێناو درێژەدان بە بەرەنگاربوونەوەی گەندەڵی دووپاتکردەوە.