عێراق, کۆڤید- ١٩

سلێمانی.. رۆژانی جەژن سەردانکردنی ماڵان و چوونە سەرقەبران قەدەغەیە

لیژنەی باڵای ئۆپراسیۆنەكانی پارێزگای سلێمانی: "لە رۆژانی جەژنی قورباندا، سەردانكردن و تێكەڵاوبوون و بەریەككەوتن و كۆبوونەوە و قەرەباڵغی و چوونە سەرقەبران و پرسەدانان و نۆجەژن قەدەغەیە".

Hawkar Yaseen   | 27.07.2020
سلێمانی.. رۆژانی جەژن سەردانکردنی ماڵان و چوونە سەرقەبران قەدەغەیە

Arbil

هەولێر AA

لیژنەی باڵای ئۆپراسیۆنەكانی پارێزگای سلێمانی تایبەت بە رێکارەکانی خۆپارێزی لە رۆژانی جەژنی قورباندا لە پارێزگای سلێمانی راگەیه‌نراوێکی بڵاوکردەوە.

بەپێی راگه‌یه‌نراوه‌كه‌ لیژنەی باڵای ئۆپەراسیۆنەکانی سلێمانی داوا لە هاووڵاتیان دەکات خۆیان لە قەرەباڵغی و سەردانکردنی یەکتر و کۆبوونەوە و ئاهەنگەکان بپارێزن و چونە سەرقەبرانیش قەدەغەیە.

دەربارەی رێکارەکانی قوربانیکردنیش، لیژنەی باڵای ئۆپەراسیۆنەکان رایگەیاندووە "قوربانیكردن لە شەقام و كۆڵان و گەڕەك و شوێنە گشتییەكاندا بە هەموو شێوەیەك قەدەغەیە و دەبێت لە قەسابخانەكاندا بكرێن و بۆ ئەم مەبەستە قەسابخانەكان لە رۆژانی جەژندا لەژێر چاودێری بەڕێوەبەرایەتی ڤێتێرنەری سلێمانیدا بە مەرجە تەندروستیەكان كراوە دەبن".

لیژنه‌ی باڵای ئۆپەراسیۆنەکانی سلێمانی دەرگای هاتنە ناوەوەی گەشتیاری بۆ پارێزگاکە داخستووە و رایده‌گه‌یه‌نێت، "هاتنی گەشتیار بۆ سنوری كارگێڕی پارێزگای سلێمانی لە پارێزگاكانی تری هەرێمی كوردستان و عێراق و كۆماری ئیسلامیی ئێرانەوە قەدەغەیە".

ده‌قی بڕیاره‌كانی لیژنه‌ی باڵای ئۆپەراسیۆنەکانی سلێمانی:

یه‌كه‌م: جەختكردنەوە لەسەر جێبەجێكردنی بەیانی ژمارە ٤٤ی ساڵی ٢٠٢٠ی وەزارەتی ناوخۆ، بە هەموو بڕگەو خاڵەكانیەوە.

دووه‌م: جەختكردنەوە لەسەر پێویستی بەردەوامبوونی هاووڵاتیان لەسەر خۆپارێزیی و خۆچارەسەركردن و بڵاوكردنەوەی هۆشیاری تەندروستی و خۆپارێزیی، كە ئەمانە دەبنە زامنی ئەوەی دۆخی تەندروستی پارێزگاكەمان لەدوای (١٥/ ٨/ ٢٠٢٠)وە بەرەو قۆناغێكی زۆرباشتر بڕوات.

سێیه‌م: لە ڕۆژانی جەژنی قوربانی پیرۆزدا، سەردانكردن و تێكەڵاوبوون و بەریەككەوتن و كۆبوونەوەو قەرەباڵغی قەدەغەن.

- چوونە سەرقەبران و پرسەدانان و نۆجەژن قەدەغەیە.

- هەموو ئاهەنگ و بۆنەو یادێكی خۆشیی و ناخۆشیی كە تێكەڵاوبوون و بەریەككەوتن دروست بكات قەدەغەیە.

- قوربانیكردن دەبێت لە قەسابخانەكاندا بكرێن و بۆ ئەم مەبەستە قەسابخانەكان لە ڕۆژانی جەژندا لەژێر چاودێری بەڕێوەبەرایەتی ڤێتێرنەری سلێمانیدا بە مەرجە تەندروستیەكان كراوە دەبن.

- قوربانیكردن لە شەقام و كۆڵان و گەڕەك و شوێنە گشتییەكاندا بە هەموو شێوەیەك قەدەغەیە.

چواره‌م: بەڕێزان زانایانی ئاینی ئیسلام و بانگبێژی مزگەوتەكان لەكاتی بانگی نوێژەكاندا لە بڵندگۆی مزگەوتەكانەوە داوای پابەندیی و خۆپارێزیی تەندروستیی لە هاووڵاتیان دەكەن.

پێنجه‌م: هاتنی گەشتیار بۆ سنوری كارگێڕی پارێزگای سلێمانی لە پارێزگاكانی تری هەرێمی كوردستان و عێراق و كۆماری ئیسلامیی ئێرانەوە قەدەغەیە.

شه‌شه‌م: سەرۆكایەتیی شارەوانیی سلێمانی و بەشی لابردنی زیادەڕەویی شارەوانیی بەپێی یاساو ڕێنماییەكان ڕێكاری پێویست بەرامبەر هەر سەرپێچی و لادان و زیادەڕەوییەك دەگرنەبەرو ئەركی هەموو هاووڵاتیان و دامودەزگا حكومییەكان و دامەزراوە دادوەرییەكان و كەرتی تایبەتە هاوكارو هەماهەنگیان بن.

حه‌وته‌م: لیژنەی تایبەت بە بەدواداچوون و چاودێریكردن و لێپرسینەوە لەسەر ئاستی یەكە كارگێڕییەكان پێكدەهێنرێت بۆ چاودێریكردنی ئاستی پابەندبوونی فەرمانگا دەوڵەتییەكان بە بڕیارو ڕێكارو ڕێنماییە تەندروستییەكانەوەو سەرپێچیكارو كەمتەرخەم ڕووبەڕووی ڕێكاری كارگێڕی و یاسایی دەكرێتەوە.

هه‌شته‌م: دەسەڵاتی تەواو دەدرێت بە سەرۆكی یەكە كارگێڕییەكان لە سنوری پارێزگای سلێمانی بۆ دەركردنی هەر ڕێكارو ڕێنماییەكی پێویست بۆ بەرەنگاربوونەوەی كۆرۆناو بەڕێوەبردنی شیاوانەی جەژنی قوربانی پیرۆز.

ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
بابه‌ته‌ په‌یوه‌ندیداره‌كان
Bu haberi paylaşın