عێراق

بەریتانیا: "دەمانەوێت سەرکردایەتیی ریفۆرمی سەربازیی وەزارەتی پێشمەرگە بکەین"

-گه‌وره‌ راوێژکاری به‌رگریی بەریتانیا بۆ ڕۆژهه‌ڵاتی ناوه‌ڕاست و باکووری ئەفریقا رایگەیاند، بەریتانیا لە هاوکاری و یارمەتییەکانی بۆ هێزی پێشمەرگە بەردەوام دەبێت و ئامانجیانە لەم قۆناغەدا سەرکردایەتیی ریفۆرمی سەربازیی بکەن لە وەزارەتی پێشمەرگەدا.

Sarmand Hameed   | 06.05.2021
بەریتانیا: "دەمانەوێت سەرکردایەتیی ریفۆرمی سەربازیی وەزارەتی پێشمەرگە بکەین"

Arbil

هەولێر - AA

گه‌وره‌ راوێژکاری به‌رگریی بەریتانیا بۆ ڕۆژهه‌ڵاتی ناوه‌ڕاست و باکووری ئەفریقا، مارشاڵ سامیوڵ سامپسۆن رایگەیاند، بەریتانیا لە هاوکاری و یارمەتییەکانی بۆ هێزی پێشمەرگە بەردەوام دەبێت و ئامانجیانە لەم قۆناغەدا سەرکردایەتیی ریفۆرمی سەربازیی بکەن لە وەزارەتی پێشمەرگەدا.

وەزیری پێشمەرگەی هەرێمی کوردستان، شۆڕش ئیسماعیل پێشوازیی لە گه‌وره‌ راوێژکاری به‌رگریی بەریتانیا بۆ رۆژهه‌ڵاتی ناوه‌ڕاست و باکووری ئەفریقا، مارشاڵ سامیوڵ سامپسۆن و راوێژکاری هێزەکانی بەریتانیا لە هەرێم، کۆڵۆنێڵ چارڵی و شاندێکی یاوه‌ری کرد.

بەگوێرەی راگەیەندراوێکی وەزارەتی پێشمەرگە، له‌ دیدارێکدا کە هەریەک لە بریکاری وەزارەت، سەربەست لەزگین و ئەمینداری گشتیی، جەبار یاوەر و سەرۆکی دەستەی ئەرکان، فەریق جەمال محەمەد و راوێژکارانی باڵای وەزارەت ئامادەیبوون، گفتوگۆ کرا، لەبارەی دوایین پێشهات و جموجۆڵ و مه‌ترسييه‌كانی داعش لە عێراق و هەرێمی کوردستاندا.

وەزیری پێشمەرگە هۆشدارییدا لە کردە تیرۆریستییەکانی داعش کە لە ئێستادا بەتەواوی خەریکی خۆرێکخستنەوەن لە رێگەی تەکتیکی تازەوە و گوتی: "بەهێزبوونەوەی داعش، مەترسییە بۆسەر ئاشتی و ئارامی جیهان، وەک چۆن پێشمەرگە لە رابردوودا شەڕی تیرۆریستانی لەبری جیهان کرد، لەئێستاشدا بۆ رێگری لەو مەترسییە پێویستیمان بەهاوکاری ئێوە و هاوپەیمانان هەیە".

لە بەشێکی دیکەی کۆبوونەوەکەدا، پرسی پەیوەندییەکانی نێوان پێشمەرگە و سوپای عێراق گفتوگۆی لەبارەوەکرا، لەم بارەیەوە جەختکرایەوە لەسەر هەماهەنگی کاری هاوبەش لەنێوان هێزەکانی پێشمەرگە و سوپاى عێراق، بە پشتیوانیی هێزه‌كانى هاوپه‌يمانان لە ناوچە کوردستانییەکانی دەرەوەی ئیدارەی هەرێمی کوردستان.

وەزیری پێشمەرگە، لەسەر هاوکارییەکانی سوپای بەریتانیا، سوپاسی گەل و حکوومەتی بەریتانیای کرد کە بەردەوام هاوکارێکی گرنگ و کاریگەر بوون.

لای خۆیەوە، گه‌وره‌ راوێژکاری به‌رگریی بەریتانیا بۆ ڕۆژهه‌ڵاتی ناوه‌ڕاست و باکووری ئەفریقا، مارشاڵ سامیوڵ سامپسۆن دڵنیایی داوە بە وەزیری پێشمەرگەی کە بەریتانیا لە هاوکاری و یارمەتییەکانی بۆ هێزی پێشمەرگە بەردەوام دەبێت و ئامانجیانە لەم قۆناغەدا سەرکردایەتیی ریفۆرمی سەربازیی بکەن لە وەزارەتی پێشمەرگەدا.

لەکۆتایی دیدارەکەدا، راوێژکارانی باڵای سەربازی بەریتانیا و تیمی باڵای وەزارەتی پێشمەرگە، هاوڕابوون لەسەر هەماهەنگی و کاری پێکەوەیی بۆ لەناوبردن و تێکشکاندنی تەواوەتی تیرۆریستانی داعش.

ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
بابه‌ته‌ په‌یوه‌ندیداره‌كان
Bu haberi paylaşın