سياسەت

بەکارهێنانی ماددەی هۆشبەر لە هەرێمی کوردستان زیادیکردووە

- وەزیری کار و کاروباری کۆمەڵایەتی کوێستان محەمەد: "ئەم شوێنانە بۆ رێژەیەکی دیاریکراو دروستکراون و ئێستاش ژمارەکان زیادیاندکردووە، لە هەمانکاتدا پێویستە ماددەکانی تاوان لە ژوورەوە پۆڵین بکەین و تاوانباران لەیەکتر جیابکەینەوە".

Heman Hussein Yaseen   | 10.11.2019
بەکارهێنانی ماددەی هۆشبەر لە هەرێمی کوردستان زیادیکردووە

Arbil

هەولێر - AA

لە هەرێمی کوردستان سێ بەڕێوەبەرایەتی چاکسازی ژنان و منداڵان لەهەریەک لە شارەکانی هەولێر، سلێمان و دهۆک هەیە کە تایبەتە بەو ژن و منداڵانەی بە تاوانی جۆراوجۆر سزا دەدرێن و وەزیری کار و کاروباری کۆمەڵایەتی حکوومەتی هەرێمی کوردستانیش نیگەرانە لە بچووکی شوێنی ئەو سزادراوانە و هاوکات رایدەگەیەنێت کە ژمارەی سزادراون بەرزبووەتەوە و بەڕێوەبەری چاکسازی ژنان و منداڵان لە هەولێرئاشکرای دەکات کە ماوەی ساڵێک دەبێت رێژەیەکی زۆر ئافرەت بە تاوانی بەکارهێنانی ماددەی هۆشبەر سزادراون و هۆکاری بەرزبوونەوەی ئەو رێژەیەش بۆ وڵاتانی دەوروبەر دەگەڕێنێتەوە.

لەمیانی سەردانیکردنی بۆ بەڕێوەبەرایەتی چاکسازی ژنان و منداڵان لە هەولێر، وەزیری کار و کاروباری کۆمەڵایەتی کوێستان محەمەد لە کۆنگرەیەکی رۆژنامەوانییدا گوتی: "ئامانجی سەردانەکەمان بۆ دوو هۆکار دەگەڕێتەوە کە یەکەمیان لە بارودۆخی زیندانەکان بپێچینەوە و بزانین پێداویستییەکان و مامەڵەی کارمەندەکان لەگەڵ زیندانەکان چۆنن، دووەمیشیان بەسەرکردنەوەی بەشەکانی ناو زیندان و چاودێریکردنی دەوامی فەرمانبەران بۆ ئەوەی سەرپەرشتی ئەو چاکسازیانە بکەین کە لەچوارچێوەی پلانی وەزارەتماندایە".

کوێستان محەمەد گوتیشی: "هۆکارێکی دیکەی سەردانەکەمان بابەتی شوێنی زیندانییەکانە، چونکە ئەم شوێنانە بۆ رێژەیەکی دیاریکراو دروستکراون و ئێستاش ژمارەکان زیادیان کردووە، لە هەمانکاتدا پێویستە ماددەکانی تاوان لە ژوورەوە پۆڵین بکەین و تاوانباران لەیەکتر جیابکەینەوە".

لەبارەی ژمارەی زیندانەکان لەناو بەڕێوەبەرایەتییەکانی چاکسازی ژنان و منداڵان، کوێستان محەمەد گوتی: "بەشێکی زۆریان ئەوانەن کە لە ناوەڕاست و باشووری عێراق هاتوون و لێرە بە ماددەی تیرۆر گیراون و بۆ ئەم مەبەستەش دەمانەوێت لەگەڵ وەزارەتی ناوخۆ و حکوومەتی عێراق هەماهەنگی بکەین بۆ گواستنەوەی زیندانەکان بە پێی پێویست".

بەڕێوەبەری گشتی چاکسازی کۆمەڵایەتی لە وەزارەتی کار و کاروباری کۆمەڵایەتی ئەحمەد نەجمەدین ئەحمەد بۆ ئاژانسی ئانادۆڵو گوتی: "لە هەرێمی کوردستان شەش بەڕێوەبەرایەتی هەیە لە هەولێر سلێمانی و دهۆک، سەرجەم ئەو کەسانەی کە تیایندا بەندکراون بریتیین لە نزیکەی ٤ هەزار و ٦٠٠ سزادراو بە پیاو، ژن و منداڵ".

هاوکات بەڕێوەبەری چاکسازی ژنان و منداڵان لە هەولێر تەیب عەبدولعەزیز هۆشداری دەدات لە بەرزبوونەوەی رێژەی ئەو کەسانەی بە تاوانی ماددەی هۆشبەر دەستگیرکراون و جەخت لەوە دەکاتەوە لەماوەی یەک ساڵی رابردوو ژمارەی ئەو کەسانەی بە تاوانی ماددەی هۆشبەر دەستگیرکراون روو لە هەڵکشانە و وڵاتانی دەوروبەریش بە هۆکار دەزانێت.

بەڕێوەبەری چاکسازی ژنان و منداڵان لە هەولێر تەیب عەبدولعەزیز بۆ ئاژانسی ئانادۆڵو گوتی: "لە بەڕێوەبەرایەتی چاکسازی ١٤ هۆبە هەیە کە لە بوارە جیاجیاکان خزمەت بە زیندانییەکان دەگەیەنێت و ئەوانیش بریتین لە بەشەکانی قوتابخانە، بنکەی تەندروستی، کتێبخانە، هۆڵی فێرکاری، یاریگا، بەشی فێربوونی میوزیک و چەند بەشێکی دیکەش کە هەموو بەشەکان دەتوانن سوودی لێ وەرگرن".

تەیب عەبدولعەزیز گوتیشی: "لێرە سێ بەش هەیە کە بریتیین لە بەشی سزادراون، راگیراوان و بەشی منداڵان کە ژمارەیان ٣٥٩ کەسە و لەو ژمارەیەش ٣٠٠ کەس لە بەشی راگیراوان و سزادراوانن و ٥٩ منداڵیش لە بەشی منداڵانن، ئەو منداڵانەیش کە لەگەڵ دایکیان گیراون".

لەبارەی ئەو تاوانەی کە زۆرترین کەسی پێ سزادراوە و لە زیندانەکانی چاکسازی ژنان و منداڵان، تەیب عەبدولعەزیز گوتی: "ساڵێک دەبێت دۆسیەکانی تایبەت بە بەکارهێنانی ماددەی هۆشبەر بە شێوەیەکی بەرچاو زیادیکردووە و ئەمەش هۆکارەکەی بۆ سنوورەکانی وڵاتانی دراوسێ دەگەڕێنینەوە کە لەوێیەوە دێنە هەرێمی کوردستان".





ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
بابه‌ته‌ په‌یوه‌ندیداره‌كان
Bu haberi paylaşın