وەزیری دەرەوەی توركیا فیدان پیرۆزبایی ٥٢هه‌مین ساڵیادی ئۆپەراسیۆنی ئاشتیی قوبرسی کرد

وەزیری دەرەوەی توركیا، هاکان فیدان پیرۆزبایی ٥٢هه‌مین ساڵیادی ئۆپەراسیۆنی ئاشتیی قوبرسی كرد و، جەختی لەسه‌ر ئه‌وە کردەوە تورکیا پێداگرانه‌ بەردەوام دەبێت لە پاراستنی ماف و بەرژەوەندییەکانی گەلی تورکی قوبرس.

لە پۆستێکدا لە هەژماری خۆی لە تۆڕی کۆمەڵایەتی، فیدان ئاماژەی بەوە کرد بە شانازی و جۆش و خرۆشەوە پیرۆزبایی ٥٢هه‌مین ساڵیادی ئۆپەراسیۆنی ئاشتیی قوبرس دەکەن، کە ئازادی و ئاسایش و پاشەڕۆژی گەلی تورکی قوبرسی مسۆگەر کردووە و، ڕایگه‌یاند: "٥٢ ساڵ لەمەوبەر و لە ڕۆژێكی وه‌ك ئه‌مڕۆدا تورکیا لە ئۆپەراسیۆنی ئاشتیی قوبرسدا کە لە چوارچێوەی ماف و ئەرکەکانی سەرچاوەگرتوو لە پەیماننامەی گەرەنتی ساڵی ١٩٦٠ ئەنجام درا، شانبەشانی موجاهیدە قارەمانەکانمان، ئاسایشی گیانی خوشک و برایانی تورکی قوبرسی ده‌سته‌به‌ر كرد کە ڕووبەڕووی هەڕەشەی لەناوچوون ببوونەوە و، بوونیانی لەسەر دوورگەکە مسۆگەر کرد. سوپای پڕ لە شانازی تورکیا بنەمای ئەو ئاشتیی، ئارامیی و سەقامگیرییەشی دانا کە زیاتر لە نیو سەدەیە لە قوبرسدا بەردەوامە".

وەزیری دەرەوەی توركیا فیدان، بە ئاماژەکردن بەوەی تورکەکانی قوبرس لە ژێر چەتری کۆماری تورکی قوبرسی باکووردا بە ئازادی و شکۆمەندی و لە ژینگەیەکی ئارامدا بەردەوامن لە ژیان، جەختی لەوە کردەوە تورکیای نیشتمانی دایک و وڵاتی گەرەنتیکار، هاوشێوەی ڕابردوو لە ئێستا و داهاتووشدا پێداگرانه‌ بەردەوام دەبێت لە بەرگریی کردن لە ماف و بەرژەوەندییەکانی گەلی تورکی قوبرس.

فیدان یادی ئەو مەهمەتچیک و موجاهیدانە كرده‌وه‌ کە لە ئۆپەراسیۆنی ئاشتیی قوبرسدا شەهید بوون و، سوپاس و پێزانینی ئاڕاستەی غازییەکان دەکات.