هاکان فیدان: "هێرشەکانی ئیسرائیل بۆ سەر سووریا یەکێکە لە گەورەترین هەڕەشەکان بۆ سەر سەقامگیریی وڵاتەکە"

وەزیری دەرەوەی تورکیا، هاکان فیدان ڕایگەیاند: "ئەو هێرشانەی ئیسرائیل کە سەروەریی و یەکپارچەیی خاکی سووریا دەکەنە ئامانج، یەکێکە لە گەورەترین هەڕەشەکان بۆ سەر سەقامگیریی وڵاتەکە".

دوای کۆبوونەوەیان لە ئەنقەرە، وەزیری دەرەوەی تورکیا فیدان و وەزیری دەرەوەی سووریا، ئەسعەد حەسەن شەیبانی کۆنگرەیەکی ڕۆژنامەوانیی هاوبەشیان ساز کرد.

وەزیری دەرەوەی تورکیا فیدان ئاماژەی بەوە کرد سووریا بە درێژایی جەنگی ئەمریکا/ئیسرائیل-ئێران وڵاتێک بوو هاوکار بووە لە پاراستنی سەقامگیریی لە ناوچەکەدا، و پاراستنی ئاسایش و ئارامیی سووریا وەک وڵاتانی ناوچەکە بەرپرسیارێتیی هاوبەشی هەمووانە.

گوتیشی: "ئەو هێرشانەی ئیسرائیل کە سەروەریی و یەکپارچەیی خاکی سووریا دەکەنە ئامانج، یەکێکە لە گەورەترین هەڕەشەکان بۆ سەر سەقامگیریی وڵاتەکە. پێویستە کۆمەڵگای نێودەوڵەتیی کاردانەوەی بەهێزتر بەرامبەر بە عەقڵیەتی داگیرکەریی ئیسرائیل نیشان بدات، پێویستە گوشار دروست بکات بۆ پابەندبوون بە ڕێککەوتنی جیاکردنەوەی هێزەکانی ساڵی ١٩٧٤ و ڕێزگرتن لە سەروەریی سووریا. لەسەر نەخشەڕێگای قۆناغی دووەمی پلانی ئاشتیی ڕێککەوتن کرا کە لەلایەن سەرۆکی ئەمریکا، دۆناڵد ترەمپەوە ڕاگەیاندرا. بەردەوامی هێرشەکانی ئیسرائیل، جارێکی دیکە ئەوە دەسەلمێنێت کە سەرۆکوەزیرانی ئیسرائیل، بنیامین ناتانیاهو ئاشتیی ناوێت. دەبینین حکوومەتەکەی ناتانیاهو کردە تیرۆریستییەکانی لە کەرتی ڕۆژئاوا و قودس چڕ کردووەتەوە".