جيهان

كێشه‌ ته‌ندروستییه‌كانی كۆچبه‌رانی سه‌ر سنووری بێلاڕووس لەگەڵ پۆڵه‌ندا له‌ هه‌ڵكشاندان

Ali Cura   | 22.11.2021
كێشه‌ ته‌ندروستییه‌كانی كۆچبه‌رانی سه‌ر سنووری بێلاڕووس لەگەڵ پۆڵه‌ندا له‌ هه‌ڵكشاندان

Hrodzyenskaya Voblasts

گرۆدنۆ – AA

كێشه‌ ته‌ندروستییه‌كانی ئه‌و كۆچبه‌رانه‌ی له‌ كه‌مپه‌ داخراوه‌كان له‌سه‌ر سنووری بێلاڕووس لەگەڵ پۆڵه‌ندا له‌ چاوه‌ڕوانی ئه‌وه‌دان بگه‌نه‌ ئه‌ورووپا تا دێت زیاتر ده‌بن.

ژیانی نزیكه‌ی دوو هه‌زار په‌ناخواز كه‌ ژماره‌یه‌ك ژن و منداڵیان له‌نێودان له‌ كه‌مپه‌ داخراوه‌كانی ناوچه‌ی سنووری بروزگی له‌ شاری گرۆندۆ رۆژئاوای بێلاڕووس تا دێت سه‌ختتر ده‌بێت.

هه‌رچه‌ند گه‌لی بێلاڕووس و دامه‌زراوه‌ په‌یوه‌ندیداره‌كانی ئه‌و وڵاته‌ هه‌وڵه‌كانیان چڕیش كردبێته‌وه‌ بۆ به‌هاناوه‌چوونی ئه‌و كۆچبه‌رانه‌، به‌ڵام پێداویستییه‌كانی ئه‌و كۆچبه‌رانه‌ تا دێت زیاتر ده‌بێت و مه‌ترسیی تووشبوونیشیان به‌ كێشه‌ ته‌ندروستییه‌كان له‌ هه‌ڵكشاندایه‌.

شاندی رێكخراوی ته‌ندروستیی جیهانی سه‌ردانی كۆچبه‌رانیان كردووه‌ و له‌باره‌ی ره‌وشی ته‌ندروستی كۆچبه‌رانیشه‌وه‌ زانیارییان له‌ جێگری سه‌ركۆماری بێلاڕووس، یوری كارایێڤ وه‌رگرتووه‌.

یوری كارایێڤ تیشكی خستووه‌ته‌ سه‌ر ئه‌وه‌ی كه‌ شه‌و و رۆژ ٢٤ كاتژمێر خزمه‌تگوزارییه‌ ته‌ندروستییه‌كان پێشكه‌ش به‌ كۆچبه‌ران ده‌كرێن و تا ئێستا نزیكه‌ی ١٠٠ كه‌س له‌ نه‌خۆشخانه‌ خه‌وێندراون، زۆربه‌ی ئه‌وانه‌ی له‌ نه‌خۆشخانه‌ش خه‌وێندراون تووشی هه‌وكردنی سییه‌كان بوون و تووشبووانی نه‌خۆشیی شه‌كره‌ن.

جێگری سه‌ركۆماری بێلاڕووس، یوری كارایێڤ گوتووشیه‌تی: "ئه‌وانه‌ی به‌ شێوه‌ی ناوبڕ تووشی كۆخه‌، هه‌ڵامه‌ت و ئازاری سك و سنگ ده‌بن تیمه‌ ته‌ندروستییه‌كان ئاگادار ده‌كه‌نه‌وه‌، منداڵان و ژنانی دووگیان له‌ كاتی پێویستدا، ره‌وانه‌ی نه‌خۆشخانه‌ ده‌كرێن".

به‌ڕێوه‌به‌ری دۆخی له‌ناكاوی نووسینگه‌ی بازنه‌ی ئه‌ورووپای رێكخراوی ته‌ندروستیی جیهانی، گێراڵد رۆكێنشاوب به‌ جه‌ختكردنه‌وه‌ له‌وه‌ی كۆچبه‌رانی سه‌ر سنووری بێلاڕووس لەگەڵ پۆڵه‌ندا له‌ ره‌وشێكی سه‌ختدا ده‌ژین، ده‌ڵێت: "ئه‌و كۆچبه‌رانه‌ ره‌وشی ته‌ندروستییان باش نییه‌. ژماره‌یه‌كیان تووشبووانی نه‌خۆشییه‌ درێژخایه‌نه‌كانن. حكوومه‌تی بێلاڕووس هه‌وڵی چاره‌سه‌ركردنی ئه‌و كێشانه‌ ده‌دات. زۆربه‌ی كۆچبه‌ران نایانه‌وێت بگه‌ڕێنه‌وه‌ وڵاته‌كانیان".

ئه‌م دوو هه‌زار كۆچبه‌ره‌ كه‌ سه‌ره‌تا دارستانیان به‌ درێژایی سنوور بڕی و دواتر هێندرانه‌ ناو كه‌مپه‌ داخراوه‌كان زیاتر له‌ دوو هه‌فته‌یه‌ خۆیان نه‌شۆردووه‌، ژماره‌یه‌كیان ده‌یانه‌وێت له‌ رێگای شۆردنی سه‌ریانه‌وه‌ ئه‌و پێویستییه‌ پڕ بكه‌نه‌وه‌ و ژماره‌یه‌كی دیكه‌یشیان له‌ رێگای ده‌سته‌سڕی ته‌ڕه‌وه‌ كه‌ له‌لایه‌ن رێكخراوه‌ مرۆییه‌كانه‌وه‌ به‌سه‌ریاندا دابه‌ش كراوه‌، پاكوخاوێنی خۆیان رابگرن.

ئه‌و كۆچبه‌رانه‌ی کە زۆربه‌یان له‌ عێراق و سووریاوه‌ هاتوون له‌ هەشتی تشرینی دووه‌مه‌وه‌ له‌سه‌ر سنووری بێلاڕووس لەگەڵ پۆڵه‌ندا له‌ ناوچه‌ی دارستان خۆیان كه‌پریان دروست كردبوو و له‌ چاوه‌ڕوانی كردنه‌وه‌ی سنووردا بوون، به‌ڵام دواتر ته‌واوی ئه‌و كه‌پرانه‌ چۆڵ كران و حكوومه‌تی بێلاڕووس ئه‌و كۆچبه‌رانه‌ی برده‌ ناو ئه‌و كه‌مپه‌ داخراوانه‌ی له‌ ناوچه‌كه‌ ئاماده‌ی كردن.

ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
بابه‌ته‌ په‌یوه‌ندیداره‌كان
Bu haberi paylaşın