اخبار تجزیه و تحلیل

نێچیرڤان بارزانی پێشوازی لە شاندێکی ئەمریکی کرد

- سەرۆکوەزیرانی ھەرێمی کوردستان، نێچیرڤان بارزانی پێشوازی لە جێگری یاریدەدەری وەزیری دەرەوەی ئەمریکا، ئەندرۆ پیک و باڵیۆزی ئەمریکا لە عێراق، دۆگلاس سیلیمان و شاندێکی یاوەریان کرد.

Sarmand Hameed   | 27.01.2019
نێچیرڤان بارزانی پێشوازی لە شاندێکی ئەمریکی کرد

Arbil


هەولێر - AA

سەرۆکوەزیرانی ھەرێمی کوردستان، نێچیرڤان بارزانی پێشوازی لە جێگری یاریدەدەری وەزیری دەرەوەی ئەمریکا، ئەندرۆ پیک و باڵیۆزی ئەمریکا لە عێراق، دۆگلاس سیلیمان و شاندێکی یاوەریان کرد.

ماڵپەڕی فەرمی حکوومەتی ھەریمی کوردستان بڵاوی کردووەتەوە، لە دیدارێکدا ئەندرۆ پیک خۆشحاڵیی خۆی بە دووبارە سەردانی ھەرێمی کوردستان دەربڕی و دەستخۆشی لە نێچیرڤان بارزانی کرد بۆ ھەنگاوەکانی دەربارەی چارەسەرکردنی کێشەکانی ھەولێر ـ بەغدا کە بەھۆیەوە پێشڤەچوونێکی باش لە پەیوەندییەکانی نێوان ھەردوولادا دروست بووە.

لە بەشێکی دیکەی دیدارەکەدا چەند بابەتێکی وەک ھەنگاوەکانی پێکھێنانی کابینەی نوێی حکوومەتی ھەرێمی کوردستان و کۆبوونەوەی لایەنە سیاسییەکان لەمبارەیەوە، پەیوەندییە دووقۆڵییەکان، پاڵپشتی و ھاوکارییەکانی ئەمریکا بۆ عێراق و ھەرێمی کوردستان و مەترسیی سەرھەڵدانەوەی تیرۆر، خرانە بەر باس و گفتوگۆ.

لای خۆیەوە سەرۆکوەزیرانی ھەرێمی کوردستان سوپاسی ھاوکارییەکانی ئەمریکای بۆ ھەرێمی کوردستان کرد و تیشکی خستە سەر پەرەپێدانی زیاتری پەیوەندییە دووقۆڵییەکان و بە ڕێزەوە ئاماژەی بە کار و چالاکییەکانی بەڕێز سیلیمان کرد کە دوا سەردانی بوو بۆ ھەرێمی کوردستان بەھۆی کۆتاییھاتنی ئەرکەکەی لە عێراق و ھیوای سەرکەوتنی بۆ خواست لە ئەرکی نوێیدا.

تاوتوێکردنی بارودۆخ و دوا پێشھاتەکانی ناوچەکە و چەند بابەتێکی پەیوەست بە ڕۆژھەڵاتی ناوەڕاستەوە، لایەنێکی دیکەی دیدارەکە بوو کە کۆنسولی ئەمریکا لە ھەرێمی کوردستانیش ئامادەی بوو.


ماڵپەری ئاژانسی ئانادۆڵۆ، بەشێک لەم هەواڵە ئابۆنانەی کە بڵاوکراوەتەوە لە لیستی هەواڵەکانی ئاژانسی ئانادۆڵۆ، کورت و پوخت دەکرێت ئینجا بڵاودەکرێتەوە، بۆ ئابۆنەوە کردن تکایە پەیوەندی بکەن.
بابه‌ته‌ په‌یوه‌ندیداره‌كان
Bu haberi paylaşın