Serokwezîrê Îsraîlê Binyamin Netanyahu îdia kir ku wan bi plana Serokê Amerîkayê Donald Trump a 20 madeyî ya ji bo Xezeyê va şansek da aştiyê.
Netanyahu di hevpeyvîna xwe ya ji bo qanala Amerîkan CBSê da pirsên têkildarî agirbesta li Xezeyê da bersivandin.
Netanyahu pirsa bêjer a "Hûn ji bidawîbûna şer çawa bawer dibin?" wiha bersivand:
"Me biryar da em şansekî bidin aştiyê. Madeyên plana 20 madeyî (ya Trump) gelekî eşkere ne. Berî her tiştî divê Hemas çekan dayne. Ya duduyê divê di wê mijarê da dilqaîmî çêbe ku li Xezeyê fabrîqeya çekan tuneye û qaçaxçîtiya çekan nayê kirin. Ev tê wateya bêçekbûnê."
Netanyahu diyar kir ku piştî temambûna qonaxa yekem a planê ya berdana dîlan, ew dixwazin qonaxa duyem jî temam bibe û gotina Serokê Amerîka Trump a "Hemas divê pabendî planê bibe" da bibîrxistin.
Netanyahu wiha got, "Trump got '(ku Hemas pabend nebe) her tişt dê serûbin bibe'. Ez hêvî dikim dê serûbin nebe."
Netanyahu îdia kir ku wî di du mehan da çar peyamên aştiyê yên dîrokî îmze kirin û wiha got, "Bi min rêbaza kirîna aştiyê, hêz e."