Mizgefta Xorxorê ya dîrokî ya di quntara Keleha Wanê da ku li cihekî siruştî, nêzîkî çavkaniyên avê û darên kevnare ye, piştî restorasyonê ji nimêjê ra vebû.

Mizgefta Xorxorê ya ku ji ber kîtabe û weqfiyeya wê nîne, nayê zanîn kengî û ji aliyê kê va hatiye çêkirin, ji ber taybetmendiyên wê yên avahîsaziyê tê nirxandin ku dîroka wê vedigere sedsala 18an.

Mizgefta ku Bedîuzzeman Mela Seîdê Kurdî di salên 1897-1907 û 1912-1914an da weke îbadetgeh û hucreya feqiyan bi kar anî, di hinek çavkaniyên dîrokî da tê destnîşankirin ku piştî Cenga Cîhanê ya Yekemîn ji aliyê Ermeniyan va hatiye wêrankirin.

Daîreya Çavdêrîkirin û Kordînasyona Veberhênanê ya Walîtiya Wanê û Şaredariya Bajarê Mezin sala 2012an ji bo vê mizgefta di nava siruştê da xebatên restorasyonê dan destpêkirin.

Mizgeft pabend bi eslê wê û îhtîşama wê ya dîrokî jinûva hat vejandin û her wiha bi peyarê, serastkirina peyzajê û ronîkirinê hat modernîzekirin sala 2024an bi qismî ji îbadetê ra hat vekirin.

Mizgefta dîrokî ku navê xwe ji çavkaniya avê ya li herêmê digire, piştî zêdetirî sedsalekê, îsal piştî çareserkirina kêmasiyên mayî, ji bo pênc danên nimêjê, dest bi mazûvaniya cemaetê kir.

Îmamê mizgeftê Îsmaîl Tukdan ji nûçegihanê AAyê ra got ku mizgefta kevnare yek ji navendên baweriyê yên giring ên Wanê ye.

Cafer Oguzyerê ku diyar kir ew her gava derfeta wî hebe ji bo nimêjê tê mizgeftê û got, "Em alîkariya mêvanan dikin. Berê, welatiyan nikaribû werin vir. Bi saya xebata ku hatiye kirin, welatî niha dikarin bi hêsanî ji bo serdan û seyranê werin vir. Me baxçe xemiland û em ê bi piştgiriya parêzgarê xwe vê yekê bidomînin."

Omer Karabulut jî got, "Ez cihên dîrokî yên bajêr nîşanî mêvanan didim. Bû nesîbê me ku em li cihekî wisa nimêj bikin. Ev balkêş e, em pir kêfxweş bûn. Ev cihên hêjayî serdanê ne."