Li Uludereya navçeya Şirnexê di daweta bûk û zavayekî da bûk bi hespê hat birin û ev kevneşopî hat parastin.
Li navçeyê birina bûkê ya li ser hespê kevneşopiyeke bi hezaran salan e ku carinan hin bûk û zava jî vê yekê di dawetên xwe da dişopînin.
Li bajaroka Şenobayê Diljîn Kara (21) û Rizgar Benek (23) jî di daweta xwe da çav dan vê kevneşopiyê û bûk li hespê siwar bû.
Gelê herêmê şeva heneyê cil û bergên herêmî li xwe kirin, stranên Kurdî gotin û bi simaqê va hene sitêran.
Şeva heneyê meşale hatin vêxistin, govend hatin girtin û destên bûk û zava hat henekirin.
Ji bo ku ev çanda bi hezaran salan e bê parastin û bûk ji mala bavê bi hespê bê hildan, hespek hat xemilandin.
Zava li hespê siwar bû, eqreba û mêvanên ku hatine dawetê jî bi stranan li cem wî meşiyan û çûn mala bûkê.
Bûk ji mala bavê bi hespê hat hildan û ew hespê siwar bû.
Ji bo ku bereket û hezkirin di malê da zêde bibe kûzekî pere û şekir tije bû li ber derî hat şikandin.
Paşê bi muzîkê govend hat girtin û ew zewicîn.
- "Me çanda xwe ya bi hezaran salan zindî hîşt"
Eqrebayê zava Îshak Unat ji nûçegihanê AAyê ra daxuyand berê wesayît tunebûn, bûk bi hespan dihatin birin û wiha axivî: "Me jî bûka xwe li hespê siwar kir û bi stranan anî mala zava. Me çanda xwe ya bi hezaran salan zindî hîşt."
Karmendê teqawîd Seyda Goyan ê ku li herêmê der barê çand û edetan da xebatan dike jî got li Şirnex û Hekariyê di dewatan da kevneşopiyên berê tên parastin.
Goyan got berê ji ber ku wesayît tunebûn bûk bi 30-40 hespan dihat birin, lê îro bi tenê bûk li hespekî tê siwarkirin û ev çand tê parastin ku bigîhêje nifşên tên.