Festîvala Balonan ya Kapadokyayê bi 30 balonên bi fîgurên cuda dest pê kir

"Festîvala Balonan ya Kapadokyayê" ku îsal li Nevşehirê cara heftemîn tê lidarxistin, bi beşdariya balonên bi fîgurên cuda yên ji Tirkiye û welatên din, dest pê kir.

30 balonên hewaya germ yên bi fîgurên cuda ji Amerîka, Fransa, Îngilistan, Belçîka, Hollandayê, Brezîlya, Slovakya, Awisturya û Polonyayê û herwiha ji Tirkiyeyê, beşdarî festîvalê bûn ku ji aliyê Wezareta Çand û Turîzmê va hatibû organîzekirin.

Balonên bi fîgurên cuda yên ku li qada festîvalê ya li bajaroka Goremeyê ji bo firînê amade bûn, bala geştiyarên navxweyî û navneteweyî kişandin.

Ev balonên ku bi fîgurên cihêreng, wekî dil, kund, çêlikê mirîşkan, gur, werdek, tûtî, ahtapot, rokêt, goga dinyayê û palyaço hatibûn sêwirandin, li ser newalên ku "kevirên cinan" lê hene, firînên pêşandanê pêk anîn.

Festîval wê roja 2yê Tebaxê bi dawî bibe.